Shu yilning noyabr oyi boshida «Barselona» prezidenti Xosep Mariya Bartomeuga nisbatan ishonchsizlik votumi ilgari suriladi. Ovoz berish 1 va 2 noyabr kunlari o'tkaziladi. Bu haqda Sport.es xabar tarqatdi.Manbaga ko'ra, klub Barselona shahri rahbariyatini ovoz berish o'tkazilishi borasida xabardor qildi. Insonlarning so'rovnomada ishtirok etishiga qulay bo'lishi uchun 1-2 noyabr kunlari tanlanmoqda. Shuningdek, so'rovnoma o'tkazish uchun bir nechta punktlar tashkil etiladi. Mamlakatdagi COVID-19 bilan bog'liq vaziyatni inobatga olgan holda Kataloniya sport vaziri yakuniy qarorni qabul qiladi. Eslatib o'tamiz, Bartomeuning "Barsa" prezidentligi lavozimi kelasi yilda yakuniga etadi. Ammo ishqibozlar uning ertaroq iste'foga chiqishini istashmoqda.