Reytingning yuqori 3ta o'rnida Frantsiyadan ikki vakil bor, ammo Karim Benzema yo'q. Lionel Messi esa Kilian Mbappedan ancha orqada. 2023 yil futboli allaqachon qizg'in ritmga tushib oldi. Lekin 2022 yil sarhisobi hali yakuniga etgani yo'q. Xususan, bugun o'tgan yili mahsuldorlik bobida yuqori ko'rsatkich qayd etgan futbolchilar reytingiga nazar solamiz. Avvalo, aytish kerak, bu ro'yxatga Evropa milliy chempionatlari va kuboklari, evrokuboklar va terma jamoalar safida «Gol+pas» tizimi bo'yicha eng ko'p ball to'plagan futbolchilar kiritilgan.

1. Kilian MBAPPE («PSJ», Frantsiya)

Umumiy natija: 54ta o'yinda 72 ball (53ta gol va 19ta assist)

24 yoshli futbolchi yil bo'yi fantastik mahsuldorlik ko'rsatdi. Kilian shuning barobarida 5-marta Frantsiya chempioni bo'ldi, JCh-2022 bosh to'purariga aylandi (8ta gol). «PSJ» hujumchisi jumladan, joriy mavsum yangi yilga qadar barcha turnirlar doirasida 20 marta maydonga tushib, 19ta gol va 5ta samarali uzatma qayd etdi.

2. Robert LEVANDOVSKI  («Bavariya»|«Barselona», Polsha)

Umumiy natija: 50ta o'yinda 56 ball (42ta gol va 14ta assist)

Levagol o'tgan yili 10-marta Germaniya chempioniga aylandi. «Barselona»ga o'tganidan keyin esa dastlabki 19ta o'yinda 18ta gol urdi. Shuningdek,  JCh-2022da o'z hisobiga 2ta gol va 1ta samarali uzatma yozib qo'ydi. Robert Levandovski - «Oltin butsa»-2022 sohibi.

3. Kristofer N~KUNKU («RB Leyptsig», Frantsiya)

Umumiy natija: 56ta o'yinda 56 ball (37ta gol va 19ta assist)

Kristofer JCh-2022 starti arafasida tizzasidan jarohatlanib, bosh turnir tomoshabiniga aylandi. U mundialda qatnashganida, nech­ta gol urardi - buni aytish qiyin. Chunki hujumkor yarim himoyachi Frantsiya termasining EMLdan o'rin olgan 6ta o'yinida atigi 2ta assist qayd etdi. Muhimi, N~Kunku Germaniya kubogi finalida gol urdi va «RB Leyptsig» penaltilar seriyasida «Frayburg»ni dog'da qoldirdi.

 

4. Mehdi TAREMI («Portu», Eron)

Umumiy natija: 50ta o'yinda 56 ball (35ta gol va 21ta assist)

Eronlik hujumchi o'tgan yili Portugaliya chempioni bo'lishdan tashqari, joriy ChL guruh bosqichida qattiq o'ynadi - 5ta uchrashuvda 5ta gol va 2ta samarali uzatma. Taremi Qatar mundialidan ham quruq qaytgani yo'q. U jumladan, Angliya termasi darvozasini ikki bora ishg'ol qilib, uelsliklar bilan bahsda gol assistentiga aylandi. Taremining joriy mavsumdagi natijasi - 22ta o'yinda 15ta gol va 8ta samarali uzatma.

 

5. Lionel MESSI («PSJ», Argentina)

Umumiy natija: 47ta o'yinda 54 ball (25ta gol va 29ta assist)

Argentina termasi sardori 2022 yili nihoyat, jahon kubogini qo'lga kiritdi. Qolaversa, Finalissima o'yini g'olibiga aylandi, Frantsiya chempionati va superkubogida zafar quchdi. JCh-2022da «Gol+pas» bo'yicha 10 ochko (7ta gol va 3ta assist) - Messidan chempionlik uchun munosib statistika.

 

6. Garri KEYN («Tottenxem», Angliya)

Umumiy natija: 59ta o'yinda 48 ball (33ta gol va 15ta assist)

Angliya milliy jamoasi sardori JCh-2022da 2ta gol va 3ta samarali uzatmaga mualliflik qildi. U shu tariqa terma jamoadagi gollari soni bo'yicha Ueyn Runi (53ta gol) bilan tenglashdi. 

 

7. NEYMAR («PSJ», Braziliya)

Umumiy natija: 38ta o'yinda 48 ball (28ta gol va 20ta assist)

Braziliyalik futbolchi JCh-2022da 2ta gol urib, yana 1tasiga assistentlik qilgan bo'lsada, turnirni alam bilan tark etdi. Shuni inobatga olmaganda, 2022 yilni Neymar hisobiga yozib qo'yish mumkin. Zero, u Liga 1da yana oltin medal yutdi, Frantsiya superkubogini boshi uzra baland ko'tardi. Shuningdek, mavsum-2022|2023ni zo'r boshladi: barcha turnirlardagi dastlabki 20ta o'yinda 15ta gol va 12ta samarali uzatma. 

 

8. Kodi GAKPO (PSV, Niderlandiya)

Umumiy natija: 51ta o'yinda 48 ball (26ta gol va 22ta assist)

23 yoshli vinger - JCh-2022 kashfiyoti. Kodi jumladan, Senegal, Ekvador va Qatar termalari darvozasiga yo'l topdi, ammo niderland­lar chorak finalda to'xtashdi. Futbolchi «Liverpul»ga yo'l olishiga qadar joriy mavsum Eredivizionda chinakamiga yayradi: 14ta o'yinda 9ta gol va 12ta samarali uzatma. Asosiysi, Kodi Niderlandiyaning 2022 yildagi eng yaxshi futbolchisi sifatida tan olindi.

 

9. Erling XOLAND  («Borussiya» D.|«Manchester Siti», Norvegiya)

Umumiy natija: 39ta o'yinda 47 ball (40ta gol va 7ta assist)

Norvegiyalik goleador «Manchester Siti» safiga qo'shilgach, o'z ishini paysalga solgani yo'q - APLning dastlabki 13ta o'yinida 18ta gol va 3ta assist, ChLning 4ta o'yinida esa 5ta gol. Umuman, Erling 2022 yili 4ta «xet-trik» qayd etdi, shundan 3tasini APLda. Qolaversa, EMLning 6ta uchrashuvida Norvegiya termasi uchun 6ta gol urib, yana 1tasida assist rolini bajardi.

 

10. Kevin DE BRYuYNE («Manchester Siti», Belgiya)

Umumiy natija: 52ta o'yinda 46 ball (18ta gol va 28ta assist)

Tan olingan yarim himoyachi JCh-2022da ko'zga tashlangani yo'q. Vaholanki, u mavsum-2022|2023ni o'ta effektli boshlagandi: 15ta samarali uzatmaga qo'shimcha tarzda 3ta gol. Umuman, Kevin de Bryuyne 2022 yili Angliya chempioni bo'ldi, «Oltin to'p» so'rovida 3-o'rinni egalladi. To'g'ri, u Belgiya terma jamoasida o'zini uncha ko'rsatolmadi: EMLning 5ta o'yinida 2ta gol va 1ta assist.

 A.ABDUVALIXO'JAEV tayyorladi