"Barselona" yarim himoyachisi Pedri kataloniyalik futbolchilar Dani Olmo tufayli Ispaniya terma jamoasiga boykot qilmoqchi bo'lganlari haqidagi xabarlarga javob qaytardi.

Avvalroq, agar yarim himoyachi Dani Olmo mavsumning ikkinchi qismida ro'yxatdan o'tmagan bo'lsa, "Barselona"ning 6 nafar futbolchisi terma jamoada o'ynashdan bosh tortishga tayyorligi haqida xabar berilgandi.

"Bu soxta xabar. Futbolchilar uchun Ispaniya terma jamoasida o'ynash har doim katta sharafdir. Buni kim o'ylab topganini bilmayman. Umid qilamanki, bunga hech kim ishonmadi" - dedi Pedri matbuot anjumanida.

22 yoshli yarim himoyachi Ispaniya terma jamoasi safida 30 ta o'yin o'tkazib, 2 ta gol urdi va 2 ta golli uzatmani amalga oshirdi.