«Barselona»ning niderlandiyalik yarim himoyachisi Frenki de Yong «Atletiko»ga qarshi bo'lajak to'qnashuvda ilk daqiqalardan maydonga tushishi mumkin. Bu haqda Cadena SER xabar bermoqda.

Manba bergan ma'lumotlarga ko'ra, agar de Yong 60 daqiqa yoki hech bo'lmaganda bir bo'lim o'ynashga tayyor bo'lsa, Flik uni asosiy tarkibga kiritadi. Murabbiy de Yongni startda ko'rishni istamoqda, chunki uning maydonda bo'lishi Pedrining o'yiniga ijobiy ta'sir ko'rsatadi.

Eslatib o'tamiz, de Yong jarohati sababli qariyb ikki oyni o'tkazib yubordi. Yarim himoyachi o'tgan turdagi «Espanol»ga qarshi bahsda (4:1) maydonga qaytib, olti daqiqa harakat qildi.