Ushbu ruknimizdagi eng so'nggi yangiliklar bilan tanishtirishda davom etamiz.

Auar «Arsenal»da!

Londonning «Arsenal» jamoasi «Lion» yarim himoyachisi Ussam Auar bilan shartnoma imzolash fikridan qaytgani yo'q.

«AFC Ball » nashrining ma'lum qilishicha, futbolchining oilasi uni «Arsenal»ga o'tishini istamoqda. Shu bois, futbolchi bilan «kononirlar» o'rtasidagi shaxsiy shartnoma borasida hech qanday muammo bo'lmaydi.

Avvalroq futbolchining «Yuventus»ga o'tishi borasida mish-mishlar paydo bo'lgan edi.

Milik nishonda

Neapolning «Napoli» jamoasi a'zosi Arkadiush Milik faoliyatini Italiyaning boshqa bir jamoasida o'tkazishga yaqin turibdi.

26 yoshli futbolchi uchun «Fiorentina» yaxshigina maosh ko'rsatilgan uzoq yillik shartnoma imzolashga tayyor. «Napoli» o'z futbolchisi bilan yangi shartnoma borasida kelishuvga erisha olmayapti. Shu bois, 2021 yilda erkin agentga aylanadigan futbolchi bilan bir nechta jamoalar jiddiy qiziqib qolgan.

Italiya nashrlarining ma'lum qilishicha, futbolchining o'zi ham «Fiorentina» bilan shartnoma imzolashga tayyor.

«Sheffild»ga u kerak

Angliyaning «Sheffild Yunayted» jamoasi «Manchester Yunayted» klubi yarim himoyachisi Jessi Lingard bilan shartnoma imzolamoqchi.

«The Sun» nashrining ma'lum qilishicha, klub ingliz futbolchisini yarim mavsumga ijaraga olishni reja qilgan. Klub shu yo'sinda, jamoani elitada saqlab qolishni reja qilgan.

Eslatib o'tamiz, avvalroq Sulsherning Lingard borasida hech qanday rejasi yo'q ekanligini va uni katta ehtimol bilan klub qishda qo'yib yuborishi haqida xabarlar paydo bo'lgan edi.

Eslatib o'tamiz, futbolchi bilan shuningdek «Seltik» va «Arsenal» klublari jiddiy qiziqib qolgan.

«Real»ga u endi kerak emac!

Madridning «Real» jamoasi «Renn» jamoasi tineyjeri Eduardo Kamavinganing o'rnini bosishga qodir yangi futbolchini ko'z ostiga oldi.

«Defense Central» nashrining ma'lum qilishicha, klub nishonida «Brayton» a'zosi Iv Bissuma mavjud.

Madrid klubi ayni damda bor moliyaviy imkoniyatlarini stadioni to'liq ta'mirlashga qaratgani bois, «Renn»ning 70 millionlik futbolchisidan voz kechishga tayyor.

Manbaning ma'lum qilishicha, «Brayton» o'z futbolchisini 30 million evro evaziga qo'yib yuborishga tayyor.

Firpo «Napoli»da?!

Transfer huquqi Kataloniyaning «Barselona» jamoasiga tegishli bo'lgan Ektor Firpo faoliyatini «Napoli»da davom ettirishi mumkin. 

«CDS» nashrining ma'lum qilishicha, 24 yoshli futbolchi bilan italiyaliklar jiddiy qiziqib qolishgan. Gap shundaki, «Napoli» jamoasining himoyachilaridan bir nechtasi mavsum so'nggida jamoasini almashtirishi kutilmoqda. Shu bois, klub Firpo transferiga qo'l urmoqchi. 

Eslatib o'tamiz, avvalroq «Barselona» Ektor Firponi transferga qo'ygani haqida xabarlar paydo bo'lgan edi.