«Teletranslyatsiyalar masalasi ancha nozik. Qolgan sport turlari bilan solishtirganda futbol bo'yicha ichki chempionatlarni o'tkazuvchi tashkilot sifatida PFL so'nggi uch yilda ancha oldinga yurdi. Biz bugunga kelib Sport-TV va UzReport bilan ko'p jabhalarda kelishib ishlayapmiz.

Aprel oyi Sport-TV uchun ham og'ir kelganini aytish kerak. Biz O'zbekiston Coca-Cola kubogi guruh bosqichini o'tkazayotgan vaqtimizga badiiy gimnastika bo'yicha Osiyo chempionati va jahon kubogi, og'ir atletika bo'yicha Osiyookeaniya saralash turniri, qilichbozlik bo'yicha Osiyookeaniya saralash turniri kabi xalqaro musobaqalar to'g'ri kelib qoldi. Olimpiada uchun litsenzion turnirlar sifatida ular Vazirlar Mahkamasi qaydida turadi hamda Sport-TV ularni jonli efirga olib chiqishi shart hisoblanadi.

Tabiiyki, bunday vaqtda futbol bo'yicha ichki musobaqalarga joy ochish mushkul masala. Shu boisdan odatda MTRK yana bir-ikki telekanalni Sport-TV uchun yordamga beradi. Biroq texnikani barcha musobaqalar uchun birdek taqsimlash imkonsiz, ular sanoqli.

Shularning o'zi ham ko'rsatib turibdiki, oldinda qilinishi kerak bo'lgan ishlar ko'p. Barcha sport turlarini birgina Sport-TV bilan qamrab olish imkonsiz. Qolgan sport turlarini ham ommalashtirishni istasak, Sport-TV qoshida hatto yana bir sport kanaliga ehtiyoj mavjud ekani ko'rinadi. Va albatta masala yana texnikaga, yana katta chiqimga borib taqaladi.

Teletranslyatsiyalar uchun zarur texnika esa doim juda qimmat turadi. Demak, biz bor og'irlikni telekanallarga solish emas, katta doiralarda teletranslyatsiyalar muammolariga echim topish yo'liga tezroq o'tishimiz kerak. Chunki zamon o'zgaryapti, biz undan ortda qolmasligimiz lozim.

Birgina xursand qiladigan tomoni, PFL izlanishda va qolgan turlardan ancha oldinda. O'zim Sport-TV kanalida ishlagan vaqtlarim faqatgina Paxtakor yoki Bunyodkorning Toshkentdagi o'yinlari efirga olib chiqilardi. Bugun esa Termizdagi o'yin ko'rsatilmasa muxlislar norozi bo'lyapti, bu yaxshi albatta. Kubok vaqtida hatto SportsUz bilan hamkorlikda ishlashga to'g'ri keldi. Ular 8 uchrashuvni YouTube orqali namayish etishga ko'maklashdi. Shu pallada aytish kerakki, bizni hozirdanoq 2022 yilgi mavsum tashvishga solyapti. Biz futbolning eng asosiy mana shu yo'nalishi haqida juda jiddiy bosh qotirishimiz kerak»

Diyor Imomxo'jaev