Argentina terma jamoasi bilan ilk sovrinini qo'lga kiritgan Lionel Messi Kopa Amerika—2021 musobaqasidagi g'alabasini Argentina xalqi va afsonaviy Diego Maradona xotirasiga bag'ishlashini ma'lum qildi.«Aql bovar qilmas musobaqa bo'ldi. Barcha futbolchilar bor kuchini berib harakat qildi. Ushbu jamoaning sardori bo'lish baxtiga muyassar bo'lganimdan faxrlanaman. Men bu g'alabani oilamga, do'stlarimga va bizga ishongan barcha insonlarga bag'ishlamoqchiman. Avvalo, koronavirus pandemiyasi sabab og'ir vaqtni boshdan kechirgan 45 million argentinalikka. Bu g'alaba barchamiz va albatta, qaerda bo'lmasin, bizni qo'llab-quvvatlovchi Diego Maradona uchun», — deya yozadi Messi o'z Instagram sahifasida.