Angliyaning "Kristal Pelas" hujumchisi Uilfrid Zaa kelasi yozda boshqa jamoaga o'tishi mumkin. Kataloniyaning "Barselona" klubi 30 yoshli ivuarlik futbolchining xizmatlariga qiziqish bildirmoqda, deb xabar bermoqda Sport.es.

Manbaga ko'ra, "ko'k-anorranglilar" hujumchini tekinga qo'lga kiritishni istamoqda, chunki Zaa kelasi yozda "Kristal Pelas" bilan yangi shartnoma borasida kelisha olmasa erkin agentga aylanadi. "Barselona" Uilfridni Robert Levandovski o'rniga o'rinbosar sifatida ko'rmoqda.

Oldinroq Britaniya OAVlari Zaaning "Kristal Pelas" bilan shartnomasini uzaytirish niyatida emasligi va yangi jamoa topishni rejalashtirayotgani haqida xabarlar tarqalgandi. Premer-liganing 2022/2023 yilgi mavsumida Uilfrid 15 ta o'yinda maydonga tushib, 6 ta gol urdi va 2 ta golli uzatmani amalga oshirdi. Transfermarkt portali 30 yoshli ivuarlik futbolchining narxini 32 million evroga baholamoqda.