Qishki transfer oynasi endigina ochildi va yuqori darajadagi bir qancha transferlar allaqachon amalga oshirildi. Niderlandiya terma jamoasi hujumchisi Kodi Gakpo shu yilning 3 yanvar kuni Eyndxovenning PSV klubidan “Liverpul”ga o'tgan edi. Transfer narxi qirq ikki million evroni tashkil qildi.

Ammo bu transfer summasi rekordga aylanmadi, futbol tarixidagi eng qimmat beshta qishki transferni quyida birgalikda ko'rib chiqamiz.

1. Filippe Koutino. "Liverpul"dan "Barselona"ga 135 million evro evaziga transfer.

2018 yilning yanvarida braziliyalik yarim himoyachining transferi Kataloniya klubi tarixidagi eng katta va halokatlilaridan biri bo'ldi, ayniqsa xarajatlarni hisobga olsak. O'tish davrida Koutino dunyoning eng yaxshi pleymeykerlaridan biri edi, lekin "Barselona"dagi butun davr mobaynida kamdan-kam holatlarda o'zining avvalgi darajasini ko'rsatdi xolos. Uning klubdagi eng yaxshi davri transferdan keyingi dastlabki 6 oy bo'ldi.

"Liverpul"da 201 ta o'yinda braziliyalik raqib darvozasiga 54 ta to'p yo'llab, 45 ta golli uzatmani amalga oshirgan bo'lsa, "Barsa" tarkibida jami 106 ta o'yin o'tkazgan Koutino 25 ta gol urgan va 14 ta golga assistentlik qilgan. Bu Kataloniya klubi rahbariyati va muxlislari umid qilayotgan natija emasligi aniq.

2019 yil avgust oyida Koutino “Bavariya”ga ijaraga berildi. Felippe Germaniyada o'zini biroz yaxshiroq ko'rsatdi, mamlakat chempionligi, Germaniya kubogi hamda Chempionlar ligasida g'olib chiqdi.

Braziliyalik futbolchi 2020 yilning yozida ko'plab jarohatlar tufayli "Barselona"ga qaytdi.

2022 yilning yanvarida Koutino "Aston Villa"ga ijara asosida ko'chib o'tdi, birmingemliklar yarim himoyachini olti oydan keyin 20 million evro evaziga sotib oldi.

2. Virjil van Deyk. “Sautgempton”dan “Liverpul”ga 84,6 million evroga transfer

Filippe Koutinoni sotib yuborgan mersisaydliklar 2018 yilning yanvar oyida o'z tarixidagi eng yaxshi transferlardan birini amalga oshirgan edi. Niderlandiyalik himoyachi yillar davomida "Liverpul"ning himoya markazini mustahkam ushlab turmoqda.

UEFA Evropaning 2019 yildagi eng yaxshi futbolchisi mersisaydliklar safida Chempionlar ligasi (2018/2019), Premer-liga (2019/2020), UEFA Superkubogi (2019), Klublar o'rtasidagi jahon chempionati (2019), Angliya kubogi (2021/2022), Angliya Superkubogi (2022), Angliya liga kubogi (2021/2022) sohibi bo'ldi.

3. Dushan Vlaxovich. “Fiorentina”dan “Yuventus”ga 81,6 million evroga transfer

Deyarli bir yil oldin Turin klubi Evropaning eng istiqbolli hujumchilaridan birini sotib oldi, u 22 yoshida "Fiorentina" uchun 108 o'yinda 49 gol urgan edi.

Vlaxovichning transferi hozircha 100 foiz o'zini oqlamagan bo'lsa ham, uning yoshi va kiritgan gollari sabab muvaffaqiyatsiz deb ayta olmaymiz. Serbiyalik hujumchi hozirda "Yuventus" safida barcha musobaqalarda 36 ta o'yinda 16 ta gol urgan.

4. Aymerik Laport. “Atletik”dan “Manchester Siti”ga 65 million evroga transfer

Xosep Gvardiola jamoasining himoya chizig'idagi asosiy o'yinchisi. “Manchester Siti” safida barcha musobaqalarda 165 ta o'yin o'tkazib, 12 ta gol urib, jamoasiga to'rtta APL chempionligi (2017/2018, 2018/2019, 2020/2021, 2021/2022), ikki marta Angliya Superkubogi (2018, 2018) sohibi bo'lishiga yordam berdi. Shuningdek uch bor Liga kubogi (2017/2018, 2018/2019, 2020/2021) va Angliya kubogini (2018/2019) qo'lga kiritdi.

5. Kristian Pulishich. Dortmundning "Borussiya"sidan "Chelsi"ga 64 million evro evaziga transfer

Tarixdagi eng qimmat amerikalik futbolchi London klubi safida 136 o'yin o'tkazib, 26 gol urgan va 21 golga assistentlik qilgan. 2022/2023 yilgi mavsumda "Chelsi" Premer-ligasi hali o'z muxlislarini xursand qilmayapti, jamoa 17 turda 25 ochko jamg'arib, chempionatda o'ninchi o'rinda bormoqda. 24 yoshli Pulishich 21 o'yin o'tkazib, bitta gol urdi va ikkita golli uzatmani amalga oshirdi.