Evropa Ligasining 1/8 finaliga o'tish o'yinida “Manchester Yunayted” va “Barselona” jamoalari 23 fevral, payshanba kuni o'zaro to'qnash keldi.Uchrashuvda mankunianliklar 2:1 hisobida (umumiy hisob 4:3) g'alaba qozondi va musobaqaning nimchorak finaliga yo'l oldi. “Manchester Yunaed” 2008 yildan buyon ilk bor kataloniyaliklar ustidan g'alaba qozondi. O'sha vaqtda “qizil iblislar” Chempionlar Ligasi yarim finalida ispan jamoasi ustidan 1:0 hisobida zafar quchgan. Shundan beri jamoalar o'zaro 5 marta to'qnash kelgan va 4 tasida “Barselona”ning qo'li baland kelgan. Bitta o'yinda durang natija qayd etilgan. Mankunianliklar joriy mavsum mag'lubiyatsiz seriyasini 9 ta o'yinga uzaytirdi. Erik ten Hag jamoasi so'nggi bor 22 yanvar kuni APL doirasida “Arsenal”ga 2:3 hisobida mag'lub bo'lgandi. Shundan so'ng jamoa 7 ta g'alaba va 2 ta durang natija qayd etdi. “Barselona” esa 2022 yil oktyabrdan buyon ilk bor mag'lubiyatga uchradi. Xavi shogirdlari so'nggi bor 26 oktyabrda “Bavariya”ga imkoniyatni boy bergandi. Shundan keyin “ko'k-anorranglilar” 16 ta g'alaba va 2 ta durang qayd etgandi. Xavi qo'l ostida jamoa so'nggi 14 oyda 4 marta Evrokuboklardan chiqib ketdi. 2021/22 yilgi mavsumda Chempionlar Ligasi guruh bosqichidan va Evropa Ligasi 1/4 final bosqichidan, joriy mavsumda esa EChL guruh bosqichi va EL 1/8 finalga o'tish o'yinida mag'lub bo'lib, o'z yurishini to'xtatdi.