Avval Germaniya chempionatining porlashi kutilayotgan iqtidorlari haqida ma'lum qilgandik. Endi esa La Liganing mana shunday vunderkindlarini birma-bir kashf etamiz.

Arnau Tenas (darvozabon, 22 yosh, "Barselona")

Bu yozda 21 yoshgacha bo'lgan futbolchilar o'rtasida finalchiga aylangan darvozabon erkin agentga aylanishi mumkin. Bungacha u "Barselona"ning o'rinbosarlari safida muntazam o'ynagan va o'tgan mavsumda 26 ta o'yindan 15 tasida darvozasi dahlsizligini saqlab qolgan. "La Masiya" tarbiyalanuvchisi darvozabon uchun kerak bo'lgan ko'pgina hislatlar egasi. U qaysi klubda o'ynamasin jamoasining asosiy futbolchisiga aylana oladi.

Xuan Miranda (himoyachi, 23 yosh, "Betis", 7 million evro)

Miranda 2021 yilning yozida "Barselona"dan "Betis"ga o'tdi va mazkur klubda o'zini ko'rsata oldi. U yangi jamoasida himoyaning markazida barqaror o'yinlari bilan hammani o'ziga qaratdi va Evro U21 da ham terma jamoasiga ancha foyda keltirdi. Mazkur himoyachi standard vaziyatlar paytida ikkinchi qavatda ustunlik qila oladi.

Yon Pacheko (himoyachi, 22 yosh, "Real Sosedad", 6 million evro)

Hozirgi vaqtda o'yini nazorat qiladigan himoyachiga talab katta. Pachekoni eski maktab futbolchilariga o'xshatish mumkin. Ikkinchi qavatda va raqiblar bilan elkama-elka kurasha oladigan jismonan kuchli himoyachi."Real Sosedad" katta futbolga mana shunday futbolchini etishtirib chiqardi. Shuningdek u, Evro U21 da Ispaniya tarkibida o'zini etarlicha ko'rsata oldi.

Ideal.jpg" alt="El Granada busca otro delantero aparte de Karrikaburu | Ideal" width="630" />

Arnau Martines (himoyachi, 20 yosh, "Jirona", 15 million evro)

Martines ham markaziy, ham o'ng qanot himoyachisi sifatida o'ynashga qodir. U "Jirona" bilan yakuniga etgan mavsumni ajoyib o'tkazdi. Har qanday hujumchi u bilan to'qnashishga hayiqadi. Martinesda ajoyib texnika va dribling bor, bu uning pozitsiyasidagi futbolchilar uchun xos emas. Arnau orqa chiziqdan hujumlarni tashkil qila oladi.

Ivan Frasneda (himoyachi, 18 yosh, "Valyadolid", 15 million evro)

Frasneda La Ligadagi debyut mavsumida o'zini unchalik ko'rsata olmagandir. Lekin u raqiblariga etarlicha qarshilik ko'rsata oladi. Unga "Barselona", "Arsenal" va "Borussiya Dortmund" klublari qiziqish bildirishdi.

Aymar Oros (yarim himoyachi, 21 yosh, "Osasuna", 15 milllion evro)

"Osasuna" yarim himoyachisi yakuniga etgan mavsumni yaxshi o'tkazdi va jamoasining Konferentsiyalar ligasi yo'llanmasiga ega chiqishi uchun o'zining katta hissasini qo'shdi. Orosning vazifasi asosan, hujum va himoyani bog'lab berish. Aymar o'tgan mavsumda 3 ta gol va 6 ta assist qayd etdi.

Rodri (yarim himoyachi, 23 yosh, "Betis" 8 million evro)

"Betis" yarim himoyachi etishtirishda yaxshigina tajribaga ega. Fabian Ruis, Dani Sebalos va Sanches kabilar misol siftida keltiriladi. Rodri kreativ o'yin namoyish etishni xush ko'radigan, hujumlarning asosiy boshlovchisi, mukammal texnikaga ega.

Samuel Koshta (yarim himoyachi, 22 yosh, "Almeriya", 5 million evro)

Ushbu ro'yxatda ispaniyalik bo'lmagan ikkita futbolchi bor, ulardan biri portugaliyalik Koshta. U yakuniga etgan mavsumda "Almeriya" tarkibida porladi. Samuel hujumkor yarim himoyachi, lekin himoyaga ham bemalol yordam bera oladi. maydonni ko'roladi. Hujumlar asosan u orqali tashkil qilinadi.

Aleks Baena (hujumchi, 21 yil, "Vilyarreal", 20 million evro)

Mazkur futbolchi qolgan sheriklariga qaraganda ancha umidli va kelajagi porloq bo'lishi kutilmoqda. U yakuniga etga mavsumda "Vilyarreal" tarkibida La Ligada 35 ta o'yinda maydonga tushib, 6 ta gol urishga muvaffaq bo'ldi. Baena asosan, qanot hujumchisi vazifasini bajaradi. Aleks maydonda aqlli o'ynashga va vaziyatlardan maksimal foydalanishga harakat qiladi.

Gonsalo Plata (hujumchi, 22 yosh, "Valyadolid", 5 million evro)

Plata bu ro'yxatda ikkinchi ispaniyalik bo'lmagan futbolchi, u Ekvador termasi a'zosi. Gonsalo yuqori tezlik va mukammal ko'nikmaga ega bo'lgan vingersifat hujumchi. Shuningdek, u nostandart qarorlar qabul qilib hammani lol qoldiradi. Plataga ayni vaqtda Evropaning bir qancha klublaridan qiziqishlar bor.

Serxio Kamelo (hujumchi, 22 yosh, "Atletiko", 10 million evro)

"Matraschilar" yakuniga etgan mavsumda Kameloni "Rayo Valekano"ga ijaraga bergandi. U erda yosh forvard hujumchi sifatida ajoyib amaliyotga ega bo'ldi. Serxio barcha musobaqalarda 7 ta gol urdi. Aytishingiz mumkinki, ayni vaqtda 22 yoshli boshqa futbolchilar o'zini bundanda ortiq ko'rsatyapti deb, misol sifatida Mbappeni ko'rastgan holda. Shuni unutmaslik kerakki, yosh yulduzlarning aksariyati o'zini keyinroq namoyish etadi. Hujumchi o'z pozitsiyasida raqib himoyachilariga etarlicha muammo tug'dira oladi. Sheriklarini ham to'p bilan ta'minlab, jamoasiga ancha foydasi tegadigan forvard. Serxio qaysi klubda o'ynamasin o'zini imkon qadar ko'rasata oladi.

La Ligada bundan tashqari ham porlashi kutilayotgan iqtidorlar anchagina ko'p. Bu ro'yxat xamir uchidan patir xolos.