Huquqlari Germaniyaning "Leyptsig" klubiga tegishli bo'lgan ispaniyalik yarim himoyachi Dani Olmo Angliya Premer-ligasida o'ynash imkoniyatlariga ega. Bu haqda Tribal Football nashri xabar bermoqda.

Manbaga ko'ra, yarim himoyachining transferiga Londonning "Arsenal" va "Chelsi" klublari qiziqish bildirmoqda. Avvalroq, ispaniyalik futbolchini "Manchester Siti" ham o'z safiga qo'shib olmoqchi ekani haqida xabarlar tarqalgan edi. Qolaversa, “Barselona” ham Dani bilan hamkorlik qilishdan manfaatdor.

Olmoning "buqalar" bilan shartnomasi 2027 yilning iyun oyi oxirigacha amal qiladi. Futbolchining transfer qiymati 40 million evroga baholanmoqda.

Bundesliganing joriy mavsumida yarim himoyachi uchta o'yin o'tkazib, ikkita gol urdi va golli uzatmani amalga oshirdi.