Ispaniya terma jamoasi yarim himoyachisi Gavi Evro-2024 saralashi doirasidagi Gruziyaga qarshi o'yinda (3:1) tizzasidan jiddiy jarohat oldi.

Mundo Deportivo nashri xabariga ko'ra, ispaniyalik futbolchining klubi "Barselona" xalqaro o'yinlarda olgan jarohati uchun tovon puli oladi. To'lovlar har kuni, jarohatdan keyingi 28 kundan boshlab hisoblab chiqiladi va ularning miqdori Gavining maoshidan kelib chiqadi.

"Barselona" 16 dekabrdan boshlab tovon pulini talab qila oladi. Yillik maksimal miqdor 7,5 million evrogacha. Gavining tiklanish davri 6 oydan 8 oygacha bo'lishini hisobga olsak, klub 3,082 milliondan 4,315 million evrogacha tovon puli olishi mumkin.