"Transfermarkt" internet portali Ispaniya La ligasida to'p tepayotgan futbolchilarning bozor qiymatini yangiladi. "Barselona" vingeri Lamin Yamalning bozor qiymati 30 million evroga oshgan, ispaniyalik futbolchining narxi hozirda 180 million evroga teng.

Yamal 2023 yildan beri "Barselona"ning asosiy jamoasida o'ynamoqda. Futbolchining Kataloniya klubi bilan shartnomasi 2026 yilgacha mo'ljallangan. Joriy mavsumda yosh futbolchi "ko'k-anorranglilar" safida barcha turnirlarda 21 ta o'yin o'tkazib, 6 ta gol urdi va 12 ta golli uzatmani amalga oshirdi.

"Barselona" ayni damda 38 ochko bilan Ispaniya La Ligasi turnir jadvalida uchinchi o'rinda bormoqda.