«Barselona» yarim himoyachisi Gavi klubdan ketishi mumkinligi haqidagi mish-mishlarga javob berdi.  Futbolchi jamoasini o'zgartirish niyati yo'qligini ma'lum qildi. U kataloniyaliklar holatidan to'la qoniqish hosil qilganini ta'kidladi.  «Men hech qachon asosiy tarkibda maydonga tushmaganimda xafa bo'lmaganman. Odamlar ko'p narsani o'ylab topishadi, lekin bularning hammasi yolg'on. Men bu erda 5 yillik shartnoma imzolaganman va unga amal qilaman, chunki bu – hayotimning klubi. Men xotirjamman, murabbiy menga juda ishonadi», – deb Gavining so'zlarini keltiradi jurnalist Fabritsio Romano.  Joriy mavsumda Gavi «Barselona» safida barcha musobaqalar doirasida 25 ta o'yin o'tkazdi. Ushbu uchrashuvlarda u ikki gol urdi va uchta golli uzatma amalga oshirdi. Uning «ko'k-anorranglilar» bilan shartnomasi 2030 yil yozigacha amal qiladi. Avvalroq, Gaviga «PSJ» qiziqish bildirayotgani haqida xabarlar tarqalgan edi.