Madridning «Atletiko» klubi argentinalik hujumchisi Xulian Alvares 2024/2025 yilgi UEFA Chempionlar Ligasi 1/8 final bosqichining javob bahsida «Real»ga qarshi o'yinda penalti zarbasi paytida to'pga ikkinchi teginishni sezmaganini ma'lum qildi. Bu haqda jurnalist va insayder Pedro Fulyano El Larguero efirida xabar berdi.Eslatib o'tamiz, 11 metrlik zarba paytida Alvares biroz sirpandi hamda o'ng oyog'i bilan zarba berishdan oldin chap oyog'i bilan sezilar-sezilmas to'pga tegindi. To'p darvozaga kirdi, biroq VARda ishlagan mutaxassislar argentinalik futbolchining to'pga ikki marta teggani aniqlashdi. Bu esa qoidabuzarlik sifatida baholandi.Shu tariqa, ikki o'yin natijalariga ko'ra, «Real» Chempionlar Ligasi chorak finaliga yo'l oldi va u erda «Arsenal» bilan to'qnash keladi.  25 yoshli Alvares o'tgan yozda «Manchester Siti»dan «Atletiko»ga o'tgan edi. Joriy mavsumda u barcha turnirlarda 43 ta o'yinda ishtirok etib, 22 ta gol va 5 ta golli uzatma amalga oshirdi. Transfermarkt ma'lumotlariga ko'ra, futbolchining taxminiy bozor bahosi 80 million evroni tashkil qiladi.