"Barselona" bosh murabbiyi Xans-Diter Flik 2024/25 yilgi mavsum Ispaniya Kubogi finali oldidan o'z fikrlari bilan o'rtoqlashdi. Kataloniyaliklar hal qiluvchi bahsda Madridning “Real” jamoasiga qarshi maydonga tushadi. Bellashuv 26 aprel kuni Sevilyada bo'lib o'tadi.— “Real”dan bir kun kam dam olishimiz yaxshimi? Bo'lishi ham mumkin, bo'lmasligi ham. Biz ham ko'p o'yinlarni shunday sharoitda o'tkazganmiz, — dedi Flik "AS" nashriga bergan intervyusida. — “Real”da ajoyib jamoa bor va ularning murabbiyi dunyodagi eng yaxshilardan biri. Anchelotti — haqiqiy jentlmen, men uni cheksiz hurmat qilaman. Shanba kuni biz Karloning jamoasiga qarshi o'ynaymiz, va men bu o'yinni katta zavq bilan kuzataman — u ajoyib mutaxassis.Nemis murabbiyi “Barsa” va “Real” o'rtasidagi raqobat darajasini ham ta'kidladi:— “Barselona” va “Real” — buyuk jamoalar. Shu boisdan ham sovrinlar ular o'rtasida hal bo'lishi tabiiy. Biz ularga qarshi yana ikki uchrashuv o'tkazamiz. Kubok va chempionlikni qo'lga kiritishni istaymiz. Buning uchun “Real”ni mag'lub etishimiz kerak, va bunga to'liq e'tibor qaratish lozim. Bu oson bo'lmaydi, lekin biz tayyormiz.La Liganing 33 turidan so'ng “Barselona” 76 ochko bilan turnir jadvalida peshqadamlik qilmoqda. “Real” esa etti ochkoga orqada, ammo ularda bir o'yin zaxirada qolgan.