"Barselona" prezidenti Joan Laporta "Espanol"ga qarshi chempionlik o'yinidan keyin Lamin Yamalning o'yini haqida fikr bildirdi.

"Ko'k-anorranglilar" 2:0 hisobida g'alaba qozonib, muddatidan avval La Liga chempionligini qo'lga kiritdi. Birinchi gol muallifi 17 yoshli Yamal bo'lib, u derbining 53-daqiqasida uzoq masofadan chiroyli zarba yo'llab, gol urdi. Yakunda vunderkind Fermin Lopesga assistentlik qildi.

"Yamal - daho. Haqiqiy futbol dahosi, bunday o'yinchilar juda kam uchraydi. U allaqachon daho futbolchilar qatoriga kiradi," - dedi "Barselona" prezidenti o'yindan keyingi intervyusida yulduz vingerni maqtab.