Argentinalik megayulduz Lionel Messi 2021 yilda "Barselona"ni tark etgandi. O'shanda moliyaviy muammolar tufayli Kataloniya klubi argentinalik futbolchiga yangi shartnoma taklif qila olmagan. Qadrdon jamoasidan ketish Messini qattiq ranjitdi - o'shandan beri futbolchi "ko'k-anorranglilar" prezidenti Joan Laporta bilan biror marta gaplashmadi.

Aytishlaricha, "Barselona" Messini kelasi yozda yangilangan "Kamp Nou"ning to'laqonli ochilishiga taklif qilmoqchi. Leo klub bilan chiroyli xayrlashishi uchun maxsus o'yin tashkil qilishlari mumkin. Biroq, hozircha Messi taklif olgani yo'q. Bundan tashqari, sakkiz karra "Oltin to'p" sohibining Laporta bilan sovuq munosabati Leoni "Kamp Nou"da sharaflashga to'sqinlik qilishi mumkin, deb yozadi Marca.