Madridning "Real" klubi bosh murabbiyi Xabi Alonso "Barselona"ga qarshi o'yinda Eduardo Kamavingani asosiy tarkibda tushirish qaroriga izoh berdi.

Frantsiyalik xavbek har doim ham "qaymoqranglilar" safida asosiy tarkibda maydonga tushavermaydi, ammo yakshanba kungi "klasiko"da u o'yinning boshidan oxirigacha o'ynadi. Uchrashuv madridliklarning 2:1 hisobidagi g'alabasi bilan yakunlandi.

"Eduardo - juda dinamik va universal futbolchi, xuddi Bellingem va Gyuler kabi. Bunday o'yinda yarim himoyada sustkashlikka yo'l qo'ya olmasdik. Maydon markazi "Barselona"ning yuqori pressingini engib o'tishda va to'pni markaz hamda qanotlar orqali oldinga olib chiqishda juda muhim rol o'ynadi," - dedi Alonso matbuot anjumanida.