"Barselona" hujumchisi Ferran Torres Ispaniya Kubogida "Rasing"ga (2:0) qarshi o'yindan so'ng intervyu berdi.

Aynan 25 yoshli forvard 66-daqiqada hisobni ochgan bo'lsa, hakam tomonidan qo'shib berilgan daqiqalarda Lamin Yamal yakuniy natijani qayd etdi.

"O'yin oxirida uchrashuv ancha ochiq tus oldi. Baxtimizga Joan Garsiya bor. O'yin bunday tus olishini kutmagandik, raqiblar bu qadar chuqur himoyalanadi deb o'ylamagandik. Ammo biz yaxshi harakat qildik va g'alaba qozona oldik. Gol urishda davom etaman. Maqsadim - jamoa va murabbiyga yordam berish," - dedi Torres jurnalistlar bilan suhbatda.