Nemis mutaxassisi bu masalada hal qiluvchi qaror futbolchining o'ziga tegishli ekanini ta'kidladi.

"Bu — uning tanlovi va kelgusi faoliyatiga bo'lgan o'z qarashi. So'nggi haftalarda bu mavzuni, albatta, muhokama qildik, ammo ehtimoliy transferlar masalasi sport direktori vakolatiga kiradi. Bizning vazifamiz — eng yaqin o'yinga tayyorgarlikka e'tibor qaratish. Shu bilan birga, Mark hozir ham "Barselona" futbolchisi, jamoa sardori va so'nggi o'n yil davomida klub hayotida muhim rol o'ynagan o'yinchi bo'lib qolmoqda. Biz uning har qanday qarorini va o'zi uchun to'g'ri deb hisoblagan rejalarini hurmat qilamiz", – dedi Flik.

Mark-Andre ter Shtegen 2014 yildan buyon kataloniyaliklar sharafini himoya qilib kelmoqda. Shu davr mobaynida u barcha musobaqalarda 423 o'yin o'tkazgan va 176 uchrashuvda darvozasini daxlsiz saqlab qolgan. Uning "Barselona" bilan amaldagi bitimi 2028 yilning yozigacha mo'ljallangan.

Transfermarkt portali ma'lumotlariga ko'ra, 31 yoshli darvozabonning hozirgi transfer qiymati 7 mln evroga baholanmoqda. Turli mish-mishlarga qaramay, "ko'k-anorranglilar" ramzlaridan birining kelajagi hali ham ochiq qolmoqda va yaqin transfer oynasining asosiy intrigalaridan biriga aylanishi mumkin.