Ispaniya chempionatining 24-turidan so'ng «Barselona» peshqadamlikni qo'ldan chiqardi. «Real»ning «Real Sosedad» ustidan qozongan g'alabasidan (4:1) ikki kun o'tib, «ko'k-anorranglilar» «Jirona»ga imkoniyatni boy berishdi (1:2). Endi kataloniyaliklar azaliy raqiblaridan ikki ochkoga ortda qolmoqda.

Yaqinda bo'lajak saylovlarda ishtirok etish uchun iste'foga chiqqan «Barselona» sobiq prezidenti Joan Laporta jamoaning chempionligiga shubha qilmayapti:

«La Ligada g'olib chiqishimizga hech qachon hozirgidek amin bo'lmaganman. Bu hammaga va hamma narsaga qarshi kechadigan chempionat bo'ladi, chunki bizning g'alaba qozonishimizni istamaydiganlar bor. Men faqat sport tomonlama gapirmayapman. Bizning chempion bo'lishimizni xohlamaydigan ma'lum bir ta'sir doiralari mavjud», — deya Laportaning so'zlarini keltiradi The Touchline.

«Barselona» navbatdagi uchrashuvini 22 fevral kuni o'z maydonida «Levante»ga qarshi o'tkazadi.