Yakshanba kuni La Liganing o'z uyida kechgan bahsida «Barselona» «Levante» ustidan g'alaba qozondi (3:0). Lamin Yamal kataloniyaliklarning asosiy tarkibida maydonga tushib, golli uzatmani amalga oshirdi va 88-daqiqada zaxiraga olindi. Jurnalistlar 18 yoshli futbolchining almashtirilganidan norozi bo'lganiga e'tibor qaratishdi va matbuot anjumanida bu haqda jamoa ustozi Hans-Diter Flikka savol berishdi.

«Yamal almashtirilganidan so'ng g'azablandimi? Bu savol faqat sizlarni tashvishga solyapti. Men uning o'yinidan mamnunman, u dahshatli futbolchi», — deya Flikning javobidan iqtibos keltiradi Barca Universal.

«Barselona» 25 turdan so'ng 61 ochko jamg'argan holda Ispaniya chempionati turnir jadvalida peshqadamlik qilmoqda. Ikkinchi o'rinda borayotgan Madridning «Real» klubi bitta ochkoga ortda qolmoqda.