«Barselona»ning sobiq yulduzi Ronaldino futbol uchrashuvlarini boshidan oxirigacha tomosha qilishni yoqtirmaydi. Braziliyalik afsona o'z pozitsiyasini tushuntirib berdi. Ronaldinoning so'zlariga ko'ra, bir yarim soatlik o'yin — bu juda ko'p.

«Menga futbol tomosha qilish yoqmaydi. Faqat eng sara vaziyatlarni ko'rish men uchun qiziq. 90 daqiqa — bu haddan tashqari ko'p. Agar bu final yoki derbi bo'lmasa, tomosha qilmayman, menga bu yoqmaydi. Asabiylasha boshlayman. "Qanday qilib bu futbolchi bunday pas berishi mumkin?" deb o'ylayman va jahlim chiqadi», — deya Ronaldinoning so'zlaridan iqtibos keltiradi Transfer News Live.

Eslatib o'tamiz, Ronaldino 2005 yilda «Oltin to'p» sohibi bo'lgan. Evropadagi faoliyati davomida braziliyalik futbolchi uchta mamlakatda — «PSJ», «Barselona» va «Milan» klublarida to'p surgan.