Dani Olmoning «Barselona»dagi kelajagi so'roq ostida. Diario SPORT nashrining xabar berishicha, «ko'k-anorranglilar» sport direktori Deku futbolchining agentlari bilan uchrashuv o'tkazgan.

Ular aynan nima haqida gaplashgani noma'lum, ammo bu uchrashuv bevosita Olmo bilan bog'liqligi tasdiqlangan. Ushbu uchrashuvda hujumchi Xulian Alvaresning «Barselona»ga o'tishi bo'yicha transfer ishlari bilan shug'ullanayotgan vositachi Xuanma Lopes ham ishtirok etgan.

Dani Olmo 2024 yilda «RB Leyptsig»dan «Barselona»ga 61 million evro evaziga o'tgan edi. Uning kataloniyaliklar bilan tuzgan shartnomasi 2030 yilning 30 iyuniga qadar mo'ljallangan.

2025/26 yilgi mavsumda yarim himoyachi kataloniyaliklar safida barcha turnirlarda 49 ta o'yinda maydonga tushib, sakkizta gol urgan va 10 ta golli uzatmani amalga oshirgan.