Angliyaning “Manchester Siti” jamoasi futbolchisini Aleksandr Zinchenko yaqindagina Ukrainaning Sports.ua nashri uchun katta intervyu berib o'tdi. Qahramonimiz ushbu intervyuda dunyoning eng kuchli besh nafar futbolchisi kim ekanligini ma'lum qildi va ularga qisqacha tarif berib o'tdi.

Killian Mbappe
Uning yosh bo'lishiga qaramay ko'rsatayotgan o'yinlariga hayron qolmaslikning iloji yo'q. U endi 21 yoshda. Agar, “Real Madrid” yoki “Barselona”dan biriga o'tadigan bo'lsa, undagi keskin o'sish bundanda jadallaroq davom etishi hech gap emas.

Krishtianu Ronaldu
Uning qanchalar yaxshi ekanligini ta'riflashga so'z ojiz. Har qanday muxlis uchun u ijrosidagi o'yinlarni stadiondan tomosha qilish juda katta sharaf. Shaxsan men uchun ham Ronladu chinakam na'munali futbolchi. Uni dunyodagi barcha sportchilar hurmat qilishlari kerak. Ronaldu shunga loyiq inson va futbolchi.

Ronaldino
Aynan Ronaldinoning o'yinlari tufayli men ilk bor ko'chaga to'p tepish uchun otilib chiqqanman. U singari charm to'p afsungarlari boshqa maydonda paydo bo'lmaydi. U to'p bilan ko'rsatgan mo''jizalarini boshqa hech kim qaytara olmasligi aniq. Endiliklda u singari texnik qobiliyat egasini yana uchratishning iloji yo'q.

Lionel Messi
Messi haqida soatlab so'zlash mumkin. U barcha zamonlarning eng yaxshi futbolchisi. Men uchun Kroyf va Maradona ham Messidan keyingi o'rindan joy olishgan. U maydonda hamma narsaga qodir. Uni chinakam gol mashinasiga qiyoslash mumkin. U qadar katta bo'lmagan jussa egasi bo'lsada, tezlik evaziga futbol tarixida muhim joy olishga muvaffaq bo'lganini alohida e'tirof etish lozim. Messi o'yin chog'ida o'zini juda erkin tutuvchi rassomga o'xshaydi. Shu sababli Messi kiritgan gollar chinakam san'at asariga aylanib ketadi.

Andrey Shevchenko
Bizda u futbol qiroli. Mustaqil Ukraina futboli tarixidagi eng yaxshi futbolchini yoqtirmaydigan birorta ukrainalik bolakay bo'lmasa kerak. Sheva buyuk futbolchi va yaxshi inson. Bundan tashqari, undagi murabbiylik mahoratini ham alohida qayd etib o'tish lozim. Bilasizmi, Shevchenkoning futbolga o'z qarashlari va o'lchovlari mavjud. Bir so'z bilan aytganda u futbol professori!