PSJ hujumchisi Neymar ingliz futbol afsonasi Devid Bekxem bilan suhbatlashdi.

"AQSHda ko‘plab imkoniyatlar mavjud. Futbol juda tez rivojlanmoqda, MLSda ajoyib futbolchilarni taklif qilish uchun juda yaxshi imkoniyat bor. Shunday qilib, keyinroq seni shartnomaga imzo qo‘yishga majbur qilaman. Va bundan keyin biz "Inter Mayami" bilan o‘n yilga shartnoma tuzamiz va biz senga ko‘p pul to‘lamaymiz", - dedi Bekxem Neymarga.

"Men bunga roziman. Ilgari men MLSda to‘p suraman deb aytgan edim. Mening Devid bilan shartnomam bor. Bir necha yildan keyin men u erda bo‘laman. Bizning umumiy rejalarimiz bor. U mening prezidentim", - dedi Neymar .

Shuni ta’kidlash kerakki, suhbat hazil ohangida bo‘lib o‘tdi, ammo har bir hazilda qandaydir haqiqat bor. Shu bois, Devid Bekxem jamoasida bir paytlar yulduz bo‘lgan braziliyalikni ko‘rish uchun barcha imkoniyat mavjud.