Ronaldino men uchun juda qadrli futbolchi. Butun dunyo koronavirus pandemiyasi bilan ovora bo'lib turgan bir vaqtda “afsungar” yana bir turnir g'olibiga aylandi. Bu shunday bir musobaqaki, unda g'oliblik bundan avval ham, katta ehtimol bilan keyin ham uning darajisidagi futbol afsonasiga nasib etmasa kerak. Soxta pasport bilan muammolardan so'ng Paragvay qamoqxonasida bo'lib turgan Ronaldino mahbuslar o'rtasidagi turnir finalining eng yaxshi futbolchisi bo'ldi. Biroz kulgili, biroz achinarli va biroz o'ylantiruvchi holat!
Kulgu va achinish nima sababli ekani hammaga tushunarli bo'lsa kerak. O'ylarchi?!
Men Ronaldinoning taqdiri ko'proq Pelega o'xshashini istardim. Garrinchaga emas. Har ikkisining o'yinini ko'rmagan bo'lsamda, aytishlaricha Garrincha Peledan qolishmaydigan darajadagi iqtidor egasi bo'lgan. Biroq, u futbolchilik vaqti ham, keyin ham turli mojaro va illatlarga o'ralashib qolgan. Shu sababli balki, yosh avlod vakillarining aksari Garrincha kimligini bilishmasa ham kerak! Buning ustiga Roni ichkarida ham ichishni davom ettirmoqda.
Ochig'i, bu voqea – qandaydir paragvaylik narkobaron tomonidan atayin uyushtirilgandek taassurot uyg'otmoqda. Aytaylik, qamoqda muddat o'tayotgan biror shartli “Pablo Eskobar” o'z sevimli futbolchisini ko'rgisi kelib qolgan bo'lishi mumkin.
Mayli nima bo'lgan taqdirda ham Ronaldinoga keyingi faoliyatida omad tilab qolaman!

Orif Tolipov.