Yaqin o'tmishning ajoyib iqtidorlaridan biri –Gaiska Mendetaham shu sanada tug'ilgan. 1974 yili Bilbao shahrida. Nozik did sohibi.
Yarim himoyada chiroyli uzatmalari va nozik harakatlari bilan minglagan muxlislarni o'ziga oshiq qilib olgan talant asosan “Valensiya” bilan eslanadi. Uning keyingi jamoalari – “Barselona” (bir yil), “Latsio” va “Midlsbro” Gaiskaning bor iste'dodini ochib bera olmadi. Aniqrog'i, “Valensiya” maktabi shunday o'yinchilarni etishtirib chiqardiki, ular boshqa klublarda o'zlarini umuman topa olishmadi. Jumladan, Mendeta ham.
Gaiska etimxonada o'sgan. Ota-onasi yoshligida qazo qilib ketishgan. Og'ir sharoitlarda cherkovga qo'shiq kuylash uchun borardi, ortib qolgan paytida futbol o'ynardi. Uning harakatlarida shu ikki soha aralashib ketganini kuzatdik keyin. Maydon markazida o'ynar ekan, doim qandaydir san'at asari yozishga urinayotgandek tuyulardi.
Ikki marta “Valensiya” bilan EChL finaliga chiqdi. Asosiy yumushni aynan Mendeta bajargan, desak, mubolag'a ishlatmagan bo'lamiz. Shuningdek, uning penaltidan mudom aniq foydalanishi ham rivoyatga aylanib ketgan. O'zining intervyusida yoshligida qaysidir o'yinda noaniq yo'llaganini aytgan. Qolgan penaltilari yuz foizlik gol edi.
Bugungi kunda kimiki “Valensiya”ga muxlislik qilaman, desa, bilingki, shu yigitning hissasi bor.

Xayrulla HAMIDOV.