"Price Waterhouse Coopers" (PWC) kompaniyasi «Barselona» klubining "I3 Ventures" kompaniyasi bilan tuzgan shartnomasini audit qildi.Fevral oyida «Barsa» klubi "I3 Ventures"ga pul to'lab, ijtimoiy tarmoqlardagi soxta akkauntlar orqali klub prezidenti Jozep Bartomeuning obro'sini ko'tarishga uringan edi. Ushbu soxta profillar klub futbolchilari — Lionel Messi va Jerar Pikening ustidan kulishgan edi. Bu holat esa o'sha paytdayoq klub ichida katta mojaroni keltirib chiqargan edi. Kataloniyaning "Diario Sport" nashri audit tekshiruvlari bo'yicha ba'zi xulosalarni e'lon qildi.1. "PWC"ning tan olishicha, "I3 Ventures"ga haddan tashqari ko'p pul to'langan. Konsalting kompaniyalari odatda bunday xizmat uchun 120 000 evrodan 150 000 evroga pul olishadi. «Barsa» esa "I3 Ventures"ga 980 000 evro to'lagan;2. "I3 Ventures"ning faoliyati shubhali. Kompaniya Urugvayda joylashgan. Ispaniyada arzon narxga sifatli xizmat ko'rsatishi mumkin bo'lgan kompaniyalar bo'lib turib, aynan ushbu tashkilot tanlangani shubhali;3. Maxsus qo'mitaning ruxsatini olishdan qochish uchun pullar 5ga bo'lib o'tkazilgan. Shartnoma miqdori 200.000 evrodan ko'p bo'ladigan bo'lsa, qo'mita ruxsatini olish talab etiladi. 4. «Barsa» "I3 Ventures"ga tegishli 5ta turli kompaniyalar bilan shartnoma imzolagan. Ularga taxminan 198000 evrodan pul o'tkazilgan. Tuzilgan shartnomalar esa deyarli bir xil ko'rinishda bo'lgan.Audit tekshiruvi hali yakunlanmadi, koronavirus pandemiyasi tufayli vaqtinchalik to'xtatib qo'yildi.Eslatib o'tamiz, avvalroq "Barselona"ning iste'foga chiqarilgan vitse-prezidenti Emili Ruso "I3 Ventures" bilan tuzilgan shartnomani klub g'aznasini o'marishga taqqoslagan edi. Ammo keyinchalik bu ayblovni inkor qilib chiqdi.