"Leyptsig" yarim himoyachisi Dani Olmo faoliyatini "Barselona"da davom ettiradi. Bu haqda insayder Fabritsio Romano xabar bermoqda.

Manba bergan xabarga ko'ra, tomonlar 26 yoshli ispaniyalik futbolchining transferi bo'yicha to'liq kelishib olgan. Ta'kidlanishicha, Olmoning xaridi "Barselona"ga 55 million evro va 7 million bonusga tushadi.

Yarim himoyachining o'zi kataloniyaliklar bilan olti yillik mehnat shartnomasini imzolaydi, deya qayd etadi Romano.

O'tgan mavsumda Olmo barcha musobaqalarda 25 ta o'yin o'tkazib, 8 ta gol urdi va 5 ta golli uzatmani amalga oshirdi. Aytish joizki, Olmo shu yozda Ispaniya terma jamoasi bilan Evropa chempioniga aylandi.