Kataloniyaning "Barselona" klubi "Leyptsig" yarim himoyachisi Dani Olmoning transferi bo'yicha kelishuvga erishdi, deb xabar beradi insayder Fabritsio Romano.

Manbaga ko'ra, kelishuv kafolatlangan to'lovlar ko'rinishida 55 million evro va bonuslar sifatida yana 7 million evroni tashkil qiladi. Olmo "ko'k-anorranglilar" bilan 2030 yilning yoziga qadar shartnoma imzolaydi.

O'tgan mavsumda Dani klub va terma jamoa safida barcha turnirlarda 32 ta o'yinda qatnashib, 13 ta gol va 7 ta golli uzatmaga mualliflik qilgan. Futbolchining "Leyptsig" bilan amaldagi shartnomasi 2027 yilning yoziga qadar amal qiladi. Transfermarkt portalida berilgan ma'lumotlarga ko'ra, futbolchining bozor qiymati 60 million evroni tashkil qiladi.