Italiyaning "Inter" klubi o'z hujumchisi Lautaro Martinesning ahvoli borasida rasmiy bayonot berdi. Martines Chempionlar ligasi yarim finalining "Barselona"ga qarshi birinchi o'yinida (3:3) jarohat oldi, shu sababli u tanaffusda maydonni tark etishga majbur bo'ldi.

"Bugun ertalab Martines turli testlardan o'tdi. Argentinalik hujumchining chap sonining bukuvchi mushaklarida zo'riqish borligi aniqlandi", - deya xabar beradi "neradzurrilar" rasmiy sayti.

Hozircha futbolchining qancha o'tkazib yuborishi noma'lumligicha qolmoqda. "Inter" va "Barselona" o'rtasidagi javob uchrashuvi 6 may kuniga belgilangan.