"Barselona" "Espanol" darvozaboni Joan Garsiyani sotib olish bandini faollashtirdi. Bitim summasi 25 mln evroni tashkil etadi.

Ispaniyalik futbolchi seyvlar soni bo'yicha La Liganing o'tgan mavsumdagi eng yaxshi darvozaboniga aylandi - 145. U bu ko'rsatkich bo'yicha "Osasuna"dan Serxio Errera (132) va "Leganes"dan Marko Dmitrovichni (104) ortda qoldirdi.

Bundan tashqari, Garsiyaning qutqarish foizi eng yuqori - 73,71%. Taxminlarga ko'ra, u kelasi mavsumda "Barselona"ning asosiy darvozaboni roliga da'vogarlik qiladi. Demak, klubni Voytsex Shesni yoki Mark-Andre ter Shtegen tark etishi mumkin.