"Barselona" kelasi yozda shov-shuvli transfer amalga oshishiga umid qilmoqda. "Ko'k-anorranglilar" Madridning "Atletiko" klubi forvardi Xulian Alvaresni nishonga olishgan - kataloniyaliklar uni Robert Levandovskining ehtimoliy o'rinbosari sifatida ko'rishmoqda.

Transfer News Live nashrining El Nacional’ga tayanib xabar berishicha, "Barsa" rahbariyati argentinalik futbolchini qo'lga kiritish uchun 100 mln evro yig'ish haqida o'ylamoqda. Bu summa "matraschilar"ni kelasi yil jahon chempionini sotishga ko'ndira olishi kerak.

Xulian Alvaresning "Atletiko" bilan shartnomasi 2030 yilgacha mo'ljallangan. Transfermarkt portali mutaxassislari 25 yoshli hujumchining narxini xuddi shu 100 mln evroga baholamoqda.