"Barselona" himoyachisi Ronald Arauxo sog'lig'i bilan bog'liq muammolar tufayli jamoani tark etishi mumkin, deb yozadi COPE.

26 yoshli futbolchi noyabr oyi oxiridan buyon maydonga tushmayapti. Avvaliga "ko'k-anorranglilar" bosh murabbiyi Xans-Diter Flik futbolchining oshqozonida muammolar borligini ma'lum qilgan bo'lsa, keyinroq Arauxo ruhiy qiyinchiliklar tufayli rejadan tashqari ta'tilga chiqqani haqida ma'lumot paydo bo'ldi. OAVda urugvaylik futbolchi 25 noyabr kuni Chempionlar ligasi doirasida "Chelsi"ga qarshi safar o'yinida (0:3) chetlatilganidan qattiq xavotirda ekani haqida xabarlar tarqalgan edi.

Manbaning ta'kidlashicha, himoyachining ruhiy salomatlik bilan bog'liq muammolari dastlab ko'ringanidan ham jiddiyroq bo'lib chiqdi. U "Barselona"da boshqa o'ynamasligi mumkin.

Arauxo "ko'k-anorranglilar" safida 2018 yildan buyon to'p tepib kelmoqda. 2025/26 yilgi mavsumda futbolchi barcha musobaqalarda 15 ta o'yinda maydonga tushib, 2 ta gol urgan.