«Barselona»ning chap qanot himoyachisi Xofre Torrents jamoani tark etishni istamadi. Catalunya Radio xabariga ko'ra, 19 yoshli futbolchi Ispaniya va xorij klublaridan bir nechta taklif olgan, biroq ularning barchasiga rad javobini berib, klubda qolishga qaror qilgan. Bosh murabbiy Xans-Diter Flik yosh lateralning istiqboliga ishonadi, «ko'k-anorranglilar» rahbariyati ham futbolchining salohiyatini yuqori baholamoqda.

Xofre Torrents asosan «Barselona»ning ikkinchi jamoasida to'p suradi, biroq u allaqachon asosiy tarkibda to'rtta o'yin o'tkazishga ulgurdi. Transfermarkt portali ispaniyalik futbolchini 1 million evroga baholamoqda, uning kataloniyaliklar bilan shartnomasi 2028 yilning yoziga qadar mo'ljallangan.