Ispaniya futbol federatsiyasi (RFEF) La liga prezidenti Xaver Tebasdan iste'foga chiqishni talab qildi. Boisi, so'nggi bir yil ichida federatsiya va Liga rahbariyati o'rtasida bir nechta sud mojarolari bo'lib o'tdi.

Mamlakatning etakchi klublari Federatsiya pozitsiyasini qo'llab-quvvatlashiga rahbariyat umid qilmoqda. Sud La liga tomonidan chempionatning 16-turidan o'rin olgan «Vilyarreal» – «Atletiko» o'yinini AQShda o'tkazish borasidagi da'vo arizasiga rad javobini berganidan so'ng tashkilotlar o'rtasidagi ziddiyat kuchayib ketdi.

Bungacha Federatsiya prezidenti Luis Rubiales va Tebas o'rtasida turli masalalarda mojarolar kelib chiqqan edi. Jumladan, chempionat taqvimi, "el-klasiko"ning yangi sanasini belgilash, Liga o'yinlarini boshqa mamlakatlarda o'tkazish kabi masalalarda.

RFEF rasmiy saytida e'lon qilingan bayonotda Xaver Tebas «ichi qora va mas'uliyatsiz» inson sifatida ta'riflangan. Federatsiya La liga klublaridan Liga prezidentini zudlik bilan iste'foga chiqarish masalasini muhokama qilishni so'radi.