"Barselona"ning sobiq hujumchisi Memfis Depayning fikricha, 2021 yilning kuzida rahbariyat bosh murabbiylik lavozimidan bo'shatilgan Ronald Kumanga nisbatan adolatsiz munosabatda bo'lgan.

"Barselona"da Kumanga juda yomon munosabatda bo'lishdi. Klubning ayrim qarorlarini hurmat qila olmayman. Murabbiy bunday munosabatga loyiq emas edi, bu adolatsizlik edi", - dedi Depay Ad.nl nashriga bergan intervyusida.

Eslatib o'tamiz, aynan Kuman 2021 yilda Depayning Frantsiyaning "Lion" klubidan erkin agent sifatida "Barselona"ga taklif qilinishi tashabbuskori bo'lgan edi. Joriy yilning yanvar oyida niderlandiyalik futbolchi kataloniyaliklar jamoasini tark etib, Madridning “Atletiko” klubiga o'tdi.