"Real" bosh murabbiyi Karlo Anchelotti "Kamp Nou"da "Barselona" ustidan qozonilgan yirik g'alaba (4:0) haqida fikr bildirdi.

"Qaymoqranglilar" Vinisius Juniorning goli va Karim Benzemaning xet-triki evaziga Ispaniya kubogi finaliga yo'l oldi. Frantsiyalik futbolchining uchta goli ham ikkinchi bo'limda kiritildi.

"Birinchi bo'limning o'yin stsenariysiga to'g'ri javob qaytardik, gol urishga muvaffaq bo'ldik. Birinchi gol har doim o'yinni o'zgartiradi. Bunday uchrashuvlarda o'yinchilarning tajribasi va individual toifasi juda muhim. Natija ko'pincha kichik detallar bilan belgilanadi - bugun birinchi gol hamma narsani hal qildi.

Men Rodrigo, Vinisius va Valverdening energiyasini Kroos va Modrichning tajribasi bilan uyg'unlashtirishga harakat qildim – bu juda ta'sirli bo'ldi”, — dedi Anchelotti o'yindan keyin.