Yozda Firmino o'zini dunyoga tanitgan "Liverpul"ni albatta tark etadi. Ko'p manbalar, jumladan Sport Sell, Bobbi "Barselona"ga o'tishi mumkinligini aytmoqda.

"Blaugranas" afsonasi Rivaldo Firmino "Barsa"da qanday qiyinchiliklarga duch kelishi mumkinligini tushuntirdi:

"So'nggi kunlarda "Barselona" mavsum oxirida "Liverpul"ni tark etmoqchi bo'lgan Firminoni sotib olishi mumkinligi haqida mish-mishlar tarqaldi. Boshqa buyuk braziliyalik futbolchilar izidan borib, Firmino "Barselona"da o'ynash orzusini amalga oshirishiga ishonaman. Ammo, menimcha, u avvalo jamoadagi o'rni qanday bo'lishini aniqlashi kerak.

Xavi doim bitta markaziy hujumchi bilan o'ynaydi, unda Robert Levandovski bor. Firminoning kelishi strategiyaning o'zgarishini anglatishi mumkin, ammo Firmino maydonda atigi bir necha daqiqa oladigan zaxira o'yinchisiga aylanishi ham mumkin. Shuning uchun u qarori haqida ko'proq bosh qotirishi kerak, deb o'ylayman. Negaki, Firminoning "Liverpul"dagi etakchi rolini yo'qotgani uning jamoani tark etishida muhim rol o'ynagan.

Shubhasiz, "Barselona"da o'ynash ushalishi mumkin bo'lgan orzu. Ammo faoliyatining keyingi bosqichida Firmino boshqa klub izlashga majbur bo'lishi mumkin, bu unga muntazam o'ynashiga ko'proq kafolat beradi".

Messi ham bu yozda "Barselona"ga ko'chib o'tishi mumkin va bu hujumda yanada ko'proq raqobat tug'diradi. Garchi, albatta, Levandovski baribir Bobbining startdagi o'rin uchun asosiy raqobatchisi bo'lib qoladi.