Buskets haqida ko'p yozildi. Ko'p yozilmoqda. Bu tabiiy. Uning futbolga kirib kelishidan ko'ra, ketishi kattaroq voqea. Tushuntiraman.Ko'pchilik uning o'z darajasida baholanmaganini yozishmoqda. O'sha buyuk «Barselona»ga Busketsning ta'siri Xavi yoki Inestadan kam emas to'g'ri, ammo tan olish kerakki, siz baribir o'zingiz muxlislik qiladigan jamoaga Xavi yoki Inesta transfer orqali kelishini xohlagan bo'lardingiz, to'g'rimi? To'g'ri.Buskets — top-futbolchi, ammo ma'lum shartlarda, ma'lum uslub doirasida. Ha, hech kim o'sha sharoit va shartlarda Busketsdan yaxshiroq bo'la olmasdi, qo'shilaman, uning tengsizligi ham shunda, ammo tarix nuqtai nazaridan baholaganda baribir Xavi yoki Inesta to'laqonli yulduz sifatida e'tirof etilaveradi. Chunki ularni har qanday jamoada tasavvur qilish, o'sha darajani kutish osonroq. Bu normal.Bir jamoada uzoq o'ynagan futbolchilar ko'p - Totti, Giggz, Maldini... Bu futbolchilar Busketsdan farqli ravishda turli «Roma», «MYu», «Milan»larda to'p surishgan. Har xil uslubda, har xil shartlarda. Busketsning aynan «Barselona» bilan bog'langani ham uning baxti, axir ma'lum bir uslubga «barsachalik» qattiq amal qilmaydigan boshqa jamoa yo'q, aks holda, Busketsning yuqori saviyadagi «umri» bunchalik uzoq bo'lmasmidi deyman, yana kim biladi.Xavi ketdi, Inesta, Pike, hatto Messi ham ketdi. Endi Buskets.Serxio Busketsga bir ta'rif o'rinli, menimcha - «borligi bilinmaydigan, ammo yo'qligi darrov bilinadigan yulduz». Shuning uchun ham, siz Xavi yoki Inestani o'z jamoangiz tarkibida ko'proq xohlashingiz mumkin, ha, ammo «Barselona»da Busketsning ketishi ko'proq bilinadi. Ko'rasiz.Qahramon Aslanov.