"Barselona" himoyachisi Jyul Kunde bir qancha Premer-liga klublarining nishoniga aylangan. Jurnalist Jerar Romeroning fikricha, frantsiyalik futbolchi faoliyatini APLda davom ettirishi mumkin.

Eslatib o'tamiz, Kunde "Barselona"da o'ng qanot himoyachisi o'ynayotganidan norozi. Frantsiyalik futbolchi rahbariyat va murabbiyning kelasi mavsumda himoya markaziga qaytishi haqidagi va'dalariga ishonmayapti. Avvalroq Kataloniya jamoasi futbolchini yozda 90 million evro evaziga qo'yib yuborishga rozi bo'lishi haqida xabar berilgandi.

Kunde o'tgan yozda Angliya Premer-ligasida ishtirok etishi mumkin edi, ammo uning Londonning "Chelsi" klubiga o'tishi so'nggi daqiqada amalga oshmay qoldi. "Ko'klar" o'shanda Jyulning o'rniga "Lester"dan Uesli Fofanani sotib olishdi.