Chempionlar ligasida ham 4 ta o‘yinning 2 tasida g‘alaba qozongan bo‘lsa, 2 tasida durrang natija qayd etdi.
Oxirgi paytlarda “Barselona” murabbiyi almashishi borasidagi mish-mishlar tinmayapti. “Barselona” ko‘rsatayotgan o‘yin juda fojiali bo‘lmasa-da, ammo ichki chempionatda “Atletik”, “Granada” va “Levante”ga boy berilgan imkoniyat holat yaxshi emasligini bildiradi.
Chempionlar ligasida ham 4 ta o‘yinning 2 tasida g‘alaba qozongan bo‘lsa, 2 tasida durrang natija qayd etdi. Bularning hammasi Ernesto Valverdening zarariga ishlaydi. Murabbiy bunday natijalar uchun iste’foga chiqarilishi mumkin. Oxirgi paytda nashrlar argentinalik mutaxassis Marselo Galyardo “Barsa” murabbiyi bo‘lishi mumkinligi haqida yozyapti. Agar Galyardo murabbiy bo‘lsa, jamoa tarixidagi 5-argentinalik murabbiyga aylanadi. “Barsa” tarixida Galyardodan oldin 4 ta argentinalik mutaxassis ishlagan. Ularga to‘xtalib o‘tamiz.
Elenio Errera
Elenio futbol tarixida o‘z o‘rniga ega bo‘lgan murabbiy hisoblanadi. Aynan u “katenachcho” taktik uslubi muallifi hisoblanadi. Aynan u “Barselona”ni boshqargan ilk argentinalik murabbiy hisoblanadi. 1958-yilda Kataloniya jamoasi uni murabbiy etib tayinladi. O‘sha yili “Real” champion bo‘lgan bo‘lsa, “Atletiko” ikkinchi va “Barselona” uchinchi o‘rinni egallagan edi. Keyingi yil esa Errera qo‘l ostidagi jamoa oltin medalni qo‘lga kiritgan. Ikkinchi o‘rindagi “Real”dan 4 ochko oldinlab ketgan edi.
1960-yil 30-iyunda Errera “Inter” taklifini qabul qildi va “Barsa”dan ketishga qaror qildi. Oradan ancha vaqt o‘tib, 1980-yilda yana “Barsa”ning murabbiylik postiga qaytib keldi. Bu safar 1 yil jamoada ishlagan murabbiy o‘tgan galdagidek titul yuta olmadi. 71 yoshidagacha murabbiylik qilgan Elenio 1997-yil Italiyaning Venetsiyasida vafot etgan.
Roke Olsen
Erreradan keyin “Barselona”ni boshqargan argentinalik murabbiy – bu Roke Olsen bo‘ldi. Olsen 1965-yil, Errera Milanga ketganidan roppa-rosa 5 yil o‘tib “Barsa” murabbiyi etib tayinlandi. Bu vaqt oralig‘ida jamoa 8 ta murabbiy almashtirishga ulgurdi. Ammo shu 8 ta murabbiy bilan faqatgina Ispaniya Kubogida g‘alaba qozona olgan. Boshqa sovrin yuta olmadi jamoa.
Roke futbolchilik faoliyatida hujumchi bo‘lgan va “Barsa”ning azaliy raqibi “Real” safida 1950-1957 yillar davomida to‘p surgan. “Real”da murabbiy bo‘lib ishlamadi, “Barsa” murabbiylik posti ishonib topshirilgach, 2 mavsum davomida jamoani boshqardi va bronza va kumush medallar bilan cheklandi.
1967-yilda Olsen va “Barsa” munosabatlari darz ketdi. Argentinalik murabbiy “Saragosa”ga ketdi, uning o‘rniga esa Salvador Artigas murabbiy bo‘ldi. U “Barsa” bilan 2 mavsum davomida Ispaniya Kubogini yuta oldi, xolos. Olsen esa 1992-yilgacha murabbiylik faoliyatini davom ettirdi. Oxirgi jamoasi “Las-Palmas” bo‘lgan va jamoadan betobligi bois ketishga majbur bo‘lgan. 1992-yil Olsen 66 yoshida onkologik kasallik tufayli vafot etdi.
Sesar Luis Menotti
Erreraning ikkinchi bor “Barsa”dan ketishidan so‘ng uning o‘rniga nemis murabbiyi Udo Lattek keldi. Lattek jamoa bilan Ispaniya Kubogi, Ispaniya Liga Kubogi va Kubok egalari Kubogini qo‘lga kiritdi. Nemis murabbiyidan so‘ng Kataloniya jamoasi yana argentinalik murabbiy xizmatiga murojaat qildi. Bu safar Argentinadan Sesar Luis Menotti olib kelindi.
Menotti Argentina bilan Jahon Chempioni bo‘lgan (1978-yil) edi. Argentinada uni judayam hurmat qilishardi. “Barsa” murabbiyi sifatidagi ilk o‘yinida hammani hayratda qoldirib, bir vaqtning o‘zida 5 ta hujumchini maydonga tushirgan edi. U hujumni yaxshi ko‘radigan murabbiy edi. “Barsa”dagi bir mavsumlik faoliyati davomida faqatgina Ispaniya Kubogi bilan chegaralandi, xolos. 1984-yil “Barsa” murabbiyligidan ketdi va Janubiy Amerikaga qaytdi. Keyinchalik yana 2 marta Evropaga qaytgan murabbiy “Atletiko”da (1987-1988) va “Sampdoriya” (1997-yil iyul-noyabr)da faoliyat olib brogan.
Hozirda Menotti Argentina futbol Assotsiatsiyasida direktorlik lavozimida faoliyat olib bormoqda.
Xerardo Martino
Menottidan so‘ng, 29 yil davomida argentinalik murabbiylar xizmatiga qiziqish bildirmadi “Barsa” rahbariyati. Ammo 2013-yil yozida Xerardo Martinoni yangi murabbiy sifatida tanishtirdi. Aytishlariga qaraganda, Martinoning “Barsa”ga kelishida Messining roli katta edi, chunki Messi va Xerardo juda yaqin do‘st bo‘lishgan.Lekin Martino murabbiylik postida 1 yil ham ishlamadi. 2014-yil may oyida iste’foga chiqishga majbur bo‘ldi. 1 mavsum davomida Xerardo qo‘l ostida “Barselona” Ispaniya Kubogida g‘alaba qozona oldi, xolos. La Ligada 2-o‘rinni egallagan jamoa Chempionlar Ligasida chorak finalda “Atletiko”dan uchralgan mag‘lubiyat evaziga o‘z yurishini to‘xtatishga majbur bo‘lgandi.
“Barselona”dan ketgach Xerardo Argentina terma jamoasida 2 yil ishladi va keyinchalik MLSda “Atlanta Yunayted” murabbiylik postini egalladi. Xerardodan keyin “Barsa”ga Luis enrike murabbiy sifatida olib kelindi. Enrike qo‘l ostida “Barselona” 2 marta Ispaniya chempionligini, 3 marta Ispaniya Kubogini, bir marta Chempionlar Ligasini, Ispaniya superkubogi, Klublar o‘rtasidagi jahon chempionligi va UEFA superkubogini qo‘lga kiritdi. Enrikedan so‘ng Valverde “Barsa” murabbiyi bo‘ldi va endi uning o‘rniga boshqa bir argentinalik murabbiy Marselo Galyardi xizmatlariga qiziqish bildiryapti rahbariyat. Agarda Galyardi murabbiy etib tayinlansa, u “Barsa” tarixidagi 5-argentinalik murabbiyga aylanadi.