"Barselona" Xavi o'rniga "Las-Palmas" bosh murabbiyi Fransisko Xaver Garsiya Pimentaning variantini ko'rib chiqmoqda, deya xabar bermoqda TodoFichajes nashri.

Manbaning xabariga ko'ra, agar kataloniyaliklarning natijalari keyingi o'yinlarda yaxshilanmasa, Xavi yaqin orada iste'foga chiqarilishi mumkin. Bu holatda Xavi o'rniga asosiy nomzod Pimenta bo'ladi.

49 yoshli ispaniyalik mutaxassis o'tgan yilning yanvar oyidan buyon "Las-Palmas"ni boshqarib kelmoqda. U avval "Barselona" tizimida ishlagan. 14 turdan keyin jamoa 18 ochko bilan La Ligada 11-o'rinda bormoqda.

“Barselona” 31 ochko bilan turnir jadvalida to'rtinchi o'rinni egallab turibdi. So'nggi turda kataloniyaliklar “Rayo Valekano” bilan durang o'ynadi (1:1).