"Barselona" bosh murabbiyi Xavi Ernandes yanvar oyida jamoaga kelib qo'shilgan hujumchi Vitor Rokening ahvoli haqida gapirdi. Shu kungacha 19 yoshli braziliyalik futbolchi Ispaniya chempionatida 7ta o'yin o'tkazishga muvaffaq bo'ldi va u o'z hisobiga ikkita gol va bitta qizil kartochka yozdirib qo'ydi.

"Roke endigina jarohatdan qaytdi, unga moslashish, tezlikni oshirish hamda tizimimizga ko'nikish uchun vaqt kerak. Hujumchi sifatida bizda Robert Levandovski bor, shuning uchun Vitor qanotda o'ynashga ko'nikmoqda. Roke bizga ko'p narsa bera oladi va u nimalarga qodirligini allaqachon ko'rsatib bo'ldi", - dedi Xavi matbuot anjumanida.