"Barselona" kiyinish xonasida klub loyihasiga shubha bor.

Diario Sport xabariga ko'ra, o'yinchilarning shubhalari Xavining ketish haqidagi qarori va uning o'rniga "Barselona" bosh murabbiyi sifatida kim tayinlanishining noaniqligi bilan bog'liq. Natijalar kutilmalarga mos kelmasa-da, Xavi qo'l ostida o'yinchilarning o'zaro aloqasi eng yuqori darajada.

Hozirgi tarkibning ko'plab futbolchilarini taklif qilishda Xavi shaxsan ishtirok etgan va bu futbolchilar yangi murabbiy qo'l ostida ularning taqdiri nima bo'lishini bilishmaydi. Misol uchun, Xavi tashabbusi bilan Jyul Kunde va Joau Kanselu "Barselona"ga o'tishdi.

Iqtisodiy qoidalarga rioya qilish uchun klub futbolchilarni sotishi kerakligi haqidagi mish-mishlar ham jamoaga yordam bermayapti. Futbolchilar o'zini noqulay his qilmoqda.

"Barselona" La Liga turnir jadvalida uchinchi o'rinda, ikkinchi o'rindagi "Jirona"dan bir ochko, peshqadam "Real Madrid"dan 8 ochko ortda. 12 mart kuni jamoa Chempionlar ligasi 1/8 finali javob o'yinini "Napoli"ga qarshi o'tkazadi (birinchi o'yin – 1:1).