"Liverpul", "Barselona" va "Real Madrid"ning sobiq yulduzlari ajoyib individual mavsumlarni o'tkazgan, ammo mavsumni sovrinsiz yakunlagan paytlari ham bo'lgan. Ushbu maqolada Xarri Keynni eslashni istardik, chunki "Bavariya" bu mavsumni sovrinsiz yakunlashi mumkin, Keyn ushbu ro'yxatga qo'shilgan navbatdagi futbolchi bo'ladi. 

Tomas Tuxel jamoasi chempionlik poygasida Leverkuzenning "Bayer"iga mag'lub bo'ldi, mavsum boshida Germaniya Superkubogi uchun o'yinda ham mag'lub bo'ldi, Germaniya kubogi uchun kurashni allaqachon tark etgan va Chempionlar ligasida g'alaba qozonishi hozircha dargumon, lekin hali ham imkoniyatlar mavjud. Biroq, Keyn, albatta, individual mavsumni ajoyib o'tkazgan va uni sovrinlarsiz yakunlagan yagona futbolchi emas. Biz ushbu hodisa bo'yicha ayrim futbolchilarni ko'rib chiqamiz.

Xarri Keyn – 2017/18 yilgi mavsum

Yuqorida aytib o'tganimizdek, Xarri Keyn birinchi marta ajoyib mavsum o'tkazayotgani yo'q, lekin uni hech qanday klub miqyosidagi mukofotlarisiz yakunlamoqda. Aslida, Xarri bu ro'yxatda bir necha bor bo'lishi mumkin edi, ammo biz ushbu mavsumga e'tibor qaratdik.

Angliya terma jamoasi sardori 2017-2018 yillarda o'zining eng yaxshi va eng muvaffaqiyatli mavsumini o'tkazdi, ammo barchasi sovrinsiz mavsum bilan yakunlandi. O'sha davrda "xo'rozlar" uchun 41 gol urganiga qaramay, "Tottenxem" Premer-ligada uchinchi o'rinni egalladi va o'sha mavsumdan umuman zavqlana olmadi.

Luis Suares – 2013/14 yilgi mavsum

Jon Ruddi hamon Luis Suares haqida dahshatli tush ko'radi. Suaresning 2013/14 yilgi futbol mavsumi barcha davrlardagi Premer-liga o'yinchilarining eng yaxshi individual mavsumi bo'lganiga kuchli dalil bor. Urugvaylik forvard chempionatning dastlabki beshta o'yinida diskvalifikatsiya qilinganiga qaramay, 33ta o'yinda 31ta gol urib, osonlik bilan “Oltin butsa”ni qo'lga kiritdi. Aynan o'sha mavsumda Suares ligada hammadan ustun ekanligini isbotladi va uni har hafta tomosha qilish juda yoqimli edi. Biroq, u boshqalardan ancha kuchliroq bo'lsa-da, o'sha mavsumni hech qanday sovrinsiz yakunladi. "Liverpul" Premer-liga chempionligini qo'lga kiritish uchun bor-yo'g'i ikki ochko kam jamg'ardi va ular Angliya Liga kubogi va Angliya kubogidan ham omadsiz tarzda chiqib ketgan.

Krishtianu Ronaldu – 2009/10 yilgi mavsum

Krishtianu Ronalduni Manchesterdan "Santyago Bernabeu"ga olib kelish uchun rekord miqdorda pul sarflagan "Real Madrid" 2009/2010 yilgi mavsum ular uchun birorta sovrinsiz yakunlanishini xayoliga ham keltirmagan bo'lsa kerak. To'g'risini aytsak, Ronaldu "Los Blankos"dagi debyut mavsumida bundan ham ko'proq ish qila olmasdi. U 33 ta gol urdi va 8 ta golli uzatmani amalga oshirdi va har 71 daqiqada raqib darvozasini o'rtacha hisobda ishg'ol qildi. Shunday qilib, u 2009/2010 yilgi mavsumda uchta asosiy chempionlikni qo'lga kiritgan Pep Gvardiola jamoasi "Barselona" bilan raqobatni boy berdi.

2010 yilning may oyida Ronaldu shunday degan edi:

"Yangi jamoadagi birinchi mavsumim menga juda yoqdi, lekin, albatta, unvonlar etarli emas edi. Men Madridda nihoyatda baxtiyorman va jamoadoshlarim menga moslashishimda ko'p yordam berishdi, ammo yakunda klub hech narsa yutmadi. Biz kurashni davom ettirishimiz kerak va ishonchim komilki, kelajakda biz ko'plab sovrinlarni qo'lga kirita olamiz".

Lionel Messi – 2019/20

Hatto futbol xudolari ham vaqti-vaqti bilan chempionlik kubogisiz qolishlari mumkin. 2019/2020 yilgi mavsumda "Barselona" lagerida tartibsizlik kuzatildi, ammo Lionel Messi muntazam ravishda gol urishda davom etdi. U ushbu mavsumni 56 ta gol bilan yakunladi, ammo ularning hech biri yaxshi natija bermadi. Kike Seten shogirdlari Chempionlar ligasida “Bavariya”dan mag'lub bo'ldi va La Liga chempionligini “Real”ga boy berdi. Shuningdek, ular Ispaniya kubogi uchun kurashda chorak finalda Bilbaoning "Atletik"iga mag'lub bo'lishdi va Ispaniya Superkubogi uchun yarim final jangida "Atletiko Madrid"ga yutqazishdi. Messi va jamoadoshlari albatta, unutishi qiyin bo'lgan yil sifatida tarixda qoldi.

Antuan Grizmann – 2015/16

2015-2016 yilgi mavsumda frantsiyalik hujumchi Antuan Grizmann tom ma'noda "Atletiko Madrid"ni orqasida ko'tarib yurdi, ammo o'sha mavsum u uchun kuboksiz qoldi. Diego Simeone shogirdlari La Liga chempionligini atigi 3 ochkoga boy berib qo'ydi va Chempionlar Ligasi finalida azaliy dushmani “Real”ga penaltilar seriyasida imkoniyatni boy berdi.O'sha mavsumda Grizmann 32 ta gol urdi va 7 ta golli uzatmani amalga oshirdi, ammo bu hech qanday musobaqada "Atletiko Madrid"ni marraga olib chiqish uchun etarli emas edi.