"Barselona" hujumchisi Ansu Fati qishki transferlar oynasida Evropaning ko'plab nufuzli klublaridan taklif oldi.

"Ko'k-anorranglilar" bosh murabbiyi Xans-Diter Flik 22 yoshli futbolchiga ishonch bildirmasligini yashirmadi, ammo u baribir qolishga qaror qildi va endi bundan afsusda. Ispaniyalik futbolchi uch oydan ortiq vaqtdan buyon maydonga tushmayapti, shuningdek, yuzaga kelgan vaziyat tufayli ruhiy qiyinchiliklarni boshdan kechira boshladi. Mundo Deportivo xabariga ko'ra, o'tgan qishda forvardga Dortmundning "Borussiya," "Beshiktosh," "Portu" va "Ayaks" klublari qiziqish bildirgan edi. Ularning hech biri futbolchini "Barselona"dan ketishga ko'ndira olmadi.

Ansu Fatining hozirgi transfer narxi Transfermarkt portali tomonidan 5 mln evroga baholanmoqda - bu uning faoliyatini boshlagan paytdagidan 16 baravar kam.